قصــــة الاشباح والبيوت المهجور الغـــرفـــة رقم 502

"المصــــح المهجـــــور وقصــــة الغـــرفـــة رقــــم 502"
شفنا بزاف ديال افلام الرعب على الاشباح والبيوت المهجورة لكن فالنهاية كنقولو هذا غير فيلم خيالي ومايمكنش يكون هادشي بصح، ولكن اش بان ليك ايلا قلت ليك هادشي بصح ؟...نمشيو للموضوع..
أغلب الديور لي كيكونو مسكونين كيكون عندهم ماضي خايب، يعني وقعو شي حوايج ماشي تال لهيه فديك الدار شحال هادي، نمشيو لميريكان بالضبط حدا مدينة "لويفيل" كاين واحد سبيطار مهجور قديم بزاف فيه 5 طاج، هاد سبيطار خلق الرعب فالناس ديال المنطقة حيت كيسمعو شي اصوات وهضرة ديال بنادم فداك سبيطار ديما مع العلم داك سبيطار مهجور من واحد الوقت..
نرجعو لور نشوفو ليسطوار ديال هاد سبيطار، هاد سبيطار كيف قلت قديم بزاف كان خاص غير بناس لي مراض ب"الموت الأبيض" لي هو مرض "السل" حاليا لي كان كيحصد آلاف الارواح حيت فداك الوقت الاطباء مالقاو حتى شي دوا لهاد المرض، الاطباء كان كيحساب ليهم بلي الدوا ديال هاد المرض هو الراحة والتعرض لأشعة الشمس واستنشاء الهواء النقي والابتعاد من التلوث، بهاد الفكرة ناضو ريوس الكبار كيبنيو سبيطارات فالأرياف والبوادي زعما البلايص لي غادة توفر فيها شروط الراحة والهواء النقي..ومن بين المصحات لي تبناو كانت واحد المصحة سميتها"ويفرلي هيلز" تبنات فولاية "كنتاكي" ف 1910 هاد المصحة كانو فيها غير جوج طاج و20 سداري ومن بعد الحرب العالمية اللولة تزاد العدد ديال مرضى الموت الابيض (السل) ونتاشر الوباء ومعندهمش مساحة فين يداواو حيت عدد المرضى كبير وسبيطار صغير يالاه فيه جوج طاج...
موهيم الناس بقاو كيتعالجو وكاين لي مات تال 1926 غاتدخل الحكومة وغاتبني مصحة كبيرة فيها 5 طاج بنفس الاسم باش تقدر تستحمل اكبر عدد من المرضى، كيف قلت ليكم الاطباء كان كيحساب ليهم بلي الدوا ديال الموت الابيض هو الراحة بما فيها الهواء النقي والتغدية والتعرض لأشعة الشمس، هاد سبيطار داروه لهاد الغرض يعني وفرو فيه هاد شروط الراحة ومن بعد مدة شي ناس تشافاو وشي وحدين ماصبروش وماتو..
علاش ماتو ؟..اساليب العلاج فهاد سبيطار كانت بدائية وقاصحة بزاف ومجرد التفكير فيها تشدك الخلعة، علاش ؟ كانو كيشدو بنادم ويجمعوهم وسط واحد الكرياج ويسدو عليهم نهار كامل باش يتعرضو للشمس ويستنشقو الهواء النقي وف ايامات البرد نفس الشيء مكيرحموهومش كيشدوهم كيديروهم وسط داك الكرياج ويسدو عليهم نهار كامل حتى يتجمدو بالبرد والثلج وكانو كيشدو شي وحدين منهم ويديرو عليهم تجارب ايلا صدقات هي هاديك ماصدقاتش كيقتلوه، كانو كيشدو بنادم كيحلو ليه كرشو ويحيدو ليه ضلعة وولا جوج من القفص الصدري باش زعما يديرو للرئة مساحة فين تمدد وتنفس مزيان، وكانو كيحلو لبنادم كرشو ويخليو الصدر ديالو محلول باش الرئة تعرض لأشعة الشمس وكانو كيجيبو نفاخة ويخشيوها لبنادم فالرئة ديالو وينفخوها باش زعما الرئة توساع..
ف لتحت ديال هاد سبيطار كان فيه واحد النفق كيخرجو منو الناس لي تعالجو يمشيو فحالهم اما دوك لي متعالجوش دايرين ليهم حتى هوما واحد النفق الطول ديالو 150 ميترو بحكم ان المصحة تبنات فوق واحد التلة، موهيم هاد النفق دايرينو لناس لي ماقدروش يداواو وجثث الموتى كيكركبوهوم من هاد النفق باش ميشوفهوم حتى واحد وباش المرضى لخرين مايتخلعوش ومايعرفوش اش وقع للمرضى لي ماداواوش..
الاحصاءات كتقول بلي مات 64 ألف مريض فهاد سبيطار كاين لي مات بسبب انتشار الوباء كاين لي مستحملش العلاج وكاين لي داروه فأر تجارب، هاد سبيطار بقى خدام وكيقتل فبنادم تال 1961 وسدوه من بعدما بانو شي اساليب العلاج جداد بحال صناعة المضادات الحيوية، ومن بعد عام غيعاودو يحلوه ف 1962 كمستشفى لعلاج ورعاية المسنين، فهاد المدة غيبداو الاطباء يجيبو المرضى المسنين والمجانين ويبداو يمارسو عليهم اساليب التعذيب لي كيعتابروها علاج تال 1981 غادي يتفضحو وغايتسد سبيطار بمرة...
من بعد مدة بداو الناس يسمعو شي حوايج كيوقعو فهاد المصح المهجور، كايسمعو الغوات ديال المرضى وبداو الناس يديرو زيارات لهاد المصح باش يتأكدو من داكشي لي كيسمعو فالليل وناضو شي وحدين ودارو كاميرات فالمصح باش يسجلو ديك الاصوات ويعرفو اش كيوقع تما...
فالطابق الخامس كان واحد البيت رقم 502 هاد البيت كان لغز كبير بالنسبة لشي ناس، علاش ؟ فهاد البيت كانت ساكنة واحد الممرضة ف 1928 هاد الممرضة شنقات راسها ونتاحرات وبقات معلقة تما مدة طويلة حتى جاو يقلبو البيت لقاوها معلقة ومعرفوش سبب الانتحار ولكن فاش دارو ليها الاطباء تشريح لقاوها حاملة لقاو فيها جنين والغريب فالامر من بعد 4 سنين غاتجي واحد الممرضة خرى وغاتسكن تما فنفس البيت ومن بعد مدة لاحت راسها من سطح ونتاحرات حتى هي بلا ميعرفو سبب الانتحار...
الزوار ديال هاد الغرفة قالو بلي سمعو شي صوت ديال شي وحدة كتقول ليهم "خرجو فحالكم" هادشي ماصدقوهش شي ناس ولكن بعدما دارو آلات تسجيل لقاو بلي بصح سبيطار مسكون بأشباح المرضى لي ماتو وتعذبو تما، من بعد مدة جا واحد السيد وشرا هاد سبيطار ومن بعد بداو شي ناس كيقولو بلي عبدة الشياطين كيمارسو الطقوس ديالهم فيه وف 2008 ناض المالك الجديد ديال هاد سبيطار وضور عليه كرياج كبير ودار فيه كاميرات مراقبة وحط فيه حراس أمن الشيء لي خلا بزاف ديال ناس يتساؤلو علاش هاد السيد دار هاد الحراسة المشددة على ود سبيطار مسكون ومهجور......يتبع..
موهيم هادشي لي كاين حاولت نعطيكم فكرة على هاد المصحة وتعرفو اش كان واقع فيها وكيفاش كانو الاطباء كيعاملو المرضى ويقتلو فيهم ويديروهم فئران تجارب باسم العلاج...تقبلو منا المجهود وكالعادة نتشاوفو فشي بلان خر....بيس
بقلــم: الـﺴـــــــﺎﻋــــﺮ