المعنى الحقيقي ديال البلاد كحلة ملي تشوف لي عندو باك +4 خدام كيشارجي وكيشطب

بنادم غالط بزااف كيحساب ليه غير يقرى ويمشي يتلاح لشي ضومين يخدم فيه وصافي هاهوا وصل وغيلقى ديك الخدمة لي كان كيحلم بيها وكولشي واجد وغايبقى يتخير فالخدامي، عرفتي ملي غاتحط رجليك فشي شركة بربي حتى غا تعرف المعنى الحقيقي ديال البلاد كحلة ملي غتبدى تشوف واحد نيفو كاطريام خدام كوميرسيال وشاد ستيلو ولاخر لي عندو باك +2 كيشارجي وكيشطب ويمسح لمواكن وغاتشوف كيفاش كيتعاملو مع الخدامة لي داخلين جداد ومعندهمش معارف فالشركة، انا كنشوف دراري داخلين جداد بديبلوماتهم كايعطيوهوم شطابة ويقولو ليهم سيرو شطبو داك زبل سير شارجي ديك سلعة سير نيطوايي ديك الماكينة سير عمر ليا هاد القرعة سير كلم ليا العساس سير جيب ليا خبزة فيها لوبية سير دير هادي ودير هادي، ايوا وداك ديبلوم ؟ سير عطيه لمول زريعة باغي تصور طرف ديال الخبز لي قاالوها لك ديرها مبغيتيش سد معاك الباب الفقر لي جابك غايجيب 10 خرين من وراك، هادي هي السياسة ديال الخدمة وبلا ماتكدب على راسك تقول لا انا عندي ديبلوم راني غانخدم بكرامة ، لا اصاحبي ملي كاتفوت الباب كاتخدم فداكشي لي بغاو هوما ماشي داكشي لي بغيتي نت وهادشي بالتجربة خدامين معايا دراري بديبلوماتهم قسما بالله مخدمينهوم فشارج وكيعطيوهوم يشطبو ودوك لي شاف عليهم ماعندهم حتى كاطريام وهادشي دزت منو شخصيا، باش تعرف را الانصاف مكاينش فهاد البلاد والكوليخ هوما لي حاكمين السوق مكاين لا كفاءة لاهم يحزنون وماتمشيش غالط راك فالمغرب ماشي ميريكان.