السكيزوفرينيا ليست بالسهولة و البساطة التي يعتقد البعض

الســــــكيــــزوفـــــــريــــــــــــنــــــــــــيا

السكيزوفرينيا و ما أدراك ما السكيزوفرينيا ليست بالسهولة و البساطة التي يعتقد البعض كاينة واحد المغالطة كبيرة فالمجتمع وعند عامة الناس ألي كايعتاقدو أن السكيزوفرينيا هي واحد التناقض فالأفكار و الأفعال أو شخصيتين في شخصية واحدة ولكن ماشي هاذي هي السكيزوفرينيا فالواقع ألي كيعرفوها ممرضي و أطباء الصحة العقلية وهادشي ألي غانحاول نقربكم منو فهاد السطور. هي باللغة العربية الفصحى تسمى "الفصام" ماشي "إنفصام الشخصية". تعتبر السكيزوفرينيا حسب منظمة الصحة العالمية من أكثر عشرة أمراض التي تحد من قدرات المريض و تجعله غير قادر على الإنخراط في الحياة الإجتماعية و المهنية. هي إضطراب عقلي دهاني مزمن (المريض ماعارفش راسو مريض) كيبقى مريض الحياة كلها الدواء كيلعب على الأعراض ديالها traitement symptomatique كيخلي المريض يرجع للحياة الإجتماعية ويعيش تقريبا بدون مشاكل ولكن ماكيعالجهاش. تتميز السكيزو بأعراض مرضية تأدي إلى إنفصال الفرد عن الحياة الواقعية و المنطق (السيد مزنزن). نسبة الإصابة بالسكيزوفرينيا محصورة ما بين 0.6 و 0.8 إلى 1 في المئة من الساكنة حسب الضروف البيئية المحيطة أو مدى التعاطي للحشيش و الكحول و المخدرات بصفة عامة ويزيد إحتمال الإصابة بها عند وجود مصاب من أفراد العائلة (النظرية الوراثية) كما أن الرجال إحصائيا أكثر عرضة بشكل طفيف من النساء لكنها كيف جميع الأمراض العقلية مكنعرفوش أسبابها بشكل مضبوط كل مايوجد الأن عبارة عن فرضيات و العلماء مازال خدامين كيبحتوا. كاتبدا السكيزوفرينيا في الحالة العادية من سن المراهقة 15 إلى الشباب 25 و تقدر تبدا في سن أقل أو تتأخر نادرا إلى ما فوق 35 سنة مع أعراض

قبلية Symptôme prodromique غير محددة من عامين إلى 5 سنوات مثلا صعوبة في التعلم أو التركيز أو التطور أو تغيير طفيف فالسلوك و التعامل مع المحيط ألخ... السكيزوفرينيا بوحدها فيها بزاف مايتقال و تكتبوا فيها كتب ولكن حنا غانحاولوا نبسطوها قدر الإمكان. السكيزوفرينيا كاتبدا يا إما على غفلة دقة وحدة على شكل إضطراب عصابي حاد بنادم كان صحة سلام شوية تفروح معصب ألي هضر كيشعل معاه ولا كيدخلها بواحد المرحلة على شكل إضطراب ثنائي القطبtroubles bipolaire الناس فرحانة فحدث مفرح هو مكتئب ولا الناس حزينة فعزاء مثلا و هو فرحان منتشي ولا كيكون كايضرب راسو auto agressif أو يضرب الناس عائلتو و الناس لاخرين ويقدر يقتل. أو كاتبدا تدريجيا المريض قبل مايدخل مرحلة السكيزوفرينيا كايكون داز من واحد الفترة كان فيها ممسوقش لراسو لعائلتو لأي حاجة و مقلق فاقد

الشهية عايش وحيد و منعزل.. نجيو دابا لمرحلة السكيزوفرينية المرضية ألي اللب ديالها هو الأفكار الهذيانية les idées délirantes من نوع Paranoïde (التوجس من الأخرين) ألي المريض كيكون مقتنع بها تماما ومكيقبلش ألي يناقشوا فيها تقدر تكون فكرة وحدة أو أكثر ألي غير منطقية و كتقطع صلة المريض بالواقع مثلا أفكار التوجس و الخوف من الأخر كيحس بلي مستهدف من عائلتو أو شخص أو جهة معينة أو أنه يكون ضحية أو يتقولب. المريض كيقول مثلا بلي عائلتو كاتبغي تدير ليه السم أو أن الديستي كيقلبو عليه أو هادوك ألي فالتلفزة كايهضرو عليه... النوع الثاني ديال الأفكار هو جنون العظمة mégalomaniaque كيحس براسو همة وشان كثر من القياس و عندو سلطة كبيرة و علم كبير و عندو علاقة أفضلية مع الإله أو شخصيات معروفة... نوع أخر ديال الأفكار هو ألي عندها علاقة بالدين Mystique كيقول بلي هو الرسول أو الله أو المهدي المنتظر و بلي نزل عليه الوحي وهادشي يمكن سبق شفتوه فالفيديوات فالفيسبوك...

ونوع ثاني أخر ديال أفكار متعلقة بالجسم Somatique كيحس مصارنو مثلا مكاينينش أو أي عضو أخر ماكاينش ماكحسش بيه أو وجهو مديفورمي.. ونوع أخر ديال الأفكار ألي متعلقة بالمراجع ديال الأشياء و الأحداث ألي مثلا كيشوف المديع كيهضر على شي كسيدة وكيقول بأن المديع كيوجه ليه الرسالة شخصيا ألخ.. هاد الأفكار الهديانية كاتجي مع واحد الباناشي ديال الأعراض ألي من بينها أن المريض كيكون مشتت dissociation psychique أليات التفكير و التركيز و المنطق و الذاكرة و العاطفة كاتشتت و ماكتبقاش تواصل مع أجزائها الشيء ألي كيخلي المريض يكون عندو أفكار قصيرة غير مترابطة كينقز من الحمارة للطيارة و الهضرة تقيلة و كاتبلوكا أو كايعاود نفس الكلام و الأفكار مع مشكل فالتركيز و التواصل و إنفصال عاطفي كايكون بارد فالعلاقة ديالو و ردود الفعل العاطفية ديالو مامسوقش للعالم كيضحك بدون سبب أو يبكي مقلق أو خايف أو معصب مع إضطرابات فالسلوك كيقدر يعنف راسو و يأدي الجسد ديالو يقدر يوصل حد الإنتحار لكن نادرا فاش كيضرب المحيط ديالو ألي كيكون غالبا عنف بارد هذا بالإضافة كيفما قلت أنه كيكون منعزل ممامسوقش ماعندوش حس المبادرة مامسوقش لراسو من ناحية النظافة الجسدية و اللباس كايقدر ياكل أي حاجة ماصالحاش للأكل ممكن ياكل من الزبالة أو يمسخ الخراء مع وجهو معندوش مشكل بالإضافة أنه مكيتحركش من بلاصتو خصوصا فالمستشفى و كيكون العضلات ديالو مشدودة يقدر يبقى

فواحد الوضعية غير مريحة بحال شي تمثال بلا ما ياخد المبادرة ويغيرها أو أنك تمد ليه يديك ميسلمش عليك syndrome catatonique بالإضافة أنه ممكن يقوم بحركات غريبة بدون سبب أو أقوال معندهاش تفسير كما أنه كيعطي للكلمات معنى مخالف أو كيختارع كلمات جداد بمعنى جديد néologisme.. نجيو دابا لأهم الأعراض وألي كاتغدي الأفكار ألي دكرنا من قبل وهي "الهلوسات" les hallucination ألي كاتكون فأغلب الحالات عبارة عن أصوات و كلام صادر من شخص أو مجموعة أشخاص كيكون موجه للمريض يقدر يون على شكل سبان من السمطة للتحث أو غوات أو تهديدات و أوامر إلا مطبقهاش غايتعاقب و هاد الأصوات كيسمعها المريض وسط راسو intrapsychique أو فودنيه هنا المريض كيزيد من صوت الموسيقى أو التلفاز باش يخفف من الأصوات أو إلى كان فالمستشفى كيطلب من الممرضة تعطيه القطن يوضعوا فودنيه هاد الأصوات كاتكون معدبة بشكل رهيب و لا يطاق (مريض قال بانه كيتمنى لو كان

مريض بالسرطان عوض السكيزوفرينيا حيتاش كيتعدب فراسو) بالإضافة للهلوسات السمعية كاينة الهلوسات المرئية ألي المريض كايشوف أشباح أو أشخاص كيتكلم معاهم ويدخل معاهم في حوارات ويعطيوه أوامر أو العالم كيتبدل عليه و الأشياء تتشوه ثم كذلك الهلوسات المرتبطة بحاسة الشم بحيث كيشم بوحدو من دون الناس شي رائحة ديال مادة معينة ألي تقدر تكون خانزة في غياب أدنى مصدر. بلا ماننساو الهلوسات الحسية الجسدية المريض كيحس بيديه مكايناش أو ماتت عليه أو كيحس بشي حاجة كاتقيصو تماما بحال كيفما كانحسوا بيها فالواقع. سالينا دابا من وصف الأعراض الرئيسية فالسكيزوفرينيا مع العلم أن المريض ليس بالضرورة ملزم يكون عندو كلشي هاد الباناشي باش نقولو مريض بالسكيزوفرينيا داكشي من كل فن طرب الشيء ألي كيعطينا مرضى سكيزوفرينيين مختلفين. ثم أخيرا المرضى بالسكيزوفرينيا يتلقون العلاج في المستشفى المختص تحث العناية و المراقبة التمريضية و الطبية مع بروتوكول علاجي كيعتامد بالأساس على أدوية مضادة للذهان antipsychotique مدى الحياة مع العلاج السلوكي و تقنيات أخرى بدرجة أقل على حسب حدة المرض.