لا ينصح بأخد المحتوى على محمل الجد. قد يحتوي على ساركازم أو رسائل مشفرة

 

 

 

 

 

((لا ينصح بأخد المحتوى على محمل الجد. قد يحتوي على ساركازم أو رسائل مشفرة.. عرفتي أش تدير، فهمو كيفما بغيتي.))
*
كلشي كايعرف فاتي فلوغ، مصطلح خرجوه "الموتقافين" ديال فيسبوك على ديك الفتاتش اللي الهم ديالها الوحيد هو الزواج، الكينونة و الوجود ديالها مرتابط بأنها تحصل على لقب "متزوجة" و تكون أميرة زوجها. ديك الفتاتش اللي نهار كاتخطب كاتسوبريمي كاع الدكورا وحتى الإناث اللي ماشي من الفصيلة ديالها. و إيلا سولتيها "كيدارة" تڭولك أنا لباس ولكن خطيبي مسكين مروّح شويا. كاتپارطاجي غير التصارو ديال الطيفال الصغار ولا اليد المحنية اللي فيها الخاتم ولا لي كوبل اللي حاطين يديهوم على الڤيتاس.. لموهم فالنهاية كاين إجماع عند "لموتقافين" على أن فاتي فلوغة سطحية و غبية. فالوقت اللي كاتجيني أنا دكية بزاف، يمكن دكاءها ماشي فمحلو يمكن مانتافقش معاها فڭاع الإختيارات ديالها ولكن كانعتارف بالذكاء ديالها وخا يكون جا غير صدفة. علاش؟ حيت فاتي فلوغة كادير اللي بغات و لكن حسي مسي ممكن تكيّف و تشرب و حتى واحد مايجيب خبار. كاتبقى فعينين الناس الفتاتش العفيفة المحبوبة أميرة أبيها. و حتى فالتصاحيب، كاتصاحب و ممكن دير نشاطات جنسية ولا ڭاع تمارس الجنس مع صاحبها (باستعمال منافذ الإغاثة حفاضا على الغشاء) و طبعا كل واحد مشات معاه كايكون أول واحد فحياتها، وهادشي علاش؟ حيت عارفة بلي الرجل المغربي كايفضل يكدب على راسو على أنه يتقبل وحدة عندها ماضي.. باختصار فاتي فلوغة عرفات من أين تُأكل الكتف، عرفات بلي الموجة عالية عليها بزاف. وبلاصة ما تواجه المجتمع والعائلة بكل عقدهم وتشبع سبان و نظرات تحقيرية وإقصاء، اختارت أنها تعوم مع الموجة و تمشي فينما بغات. عرفات بلي كاع البنات عندهم ميول للزواج و الإستقرار حتى اللي مابغاتش الزواج بغات علاقة جدية طويلة الأمد يعني بحال الزواج فنهاية المطاف، و بما أن المجتمع ديالنا دكوري و الرجل هو اللي كاتجي منو المبادرة فإن فاتي فلوغة ختارت أنها تكون من النوع المفضل عند الرجل المغربي، حيت عارفة بلي ڭاع هادوك اللي كايبرزطولها راسها بالتحرر و داكشي نهار يفكرو فالمعقول كايمشيو غير عند فاتي فلوغة. حيت كيما ڭلت قبل، الرجل المغربي كايتحرر حتى يعيا فنهاية المطاف ضروري يبقا فيه شوية من عقلية "سي السيد" (اللي فالثلاثية ديال نجيب محفوض).
إيوا دكاء هدا ولا ماشي دكاء؟ بقاي نتي فاضحة راسك فالفيسبوك و لالياتك قاضييين الغاراض 😁(سارقازم)
پس: أنا ماشي فموقع نحدد ها كيفاش خاصنا نكونو ولا ها كيفاش خاص المجتمع يكون ولكن عالأقل خاصنا ندرسو الظاهرة الفاتيفلوغية من كلشي الزوايا و نشوفو الأسباب اللي خلقاتها ماشي نمشيو ديريكت نحملوها لواحد الطرف صافي
پس2: لا أعمم
بكلافيي
Smail Jay-are