باي باي جوطون وزارة الصناعة كتمنع وكتجرم التعامل بأقراص الصباغة

  

#باي_باي_جوطون

نهار 15 مارس وزارة الصناعة خرجت ببلاغ كيمنع وكيجرم التعامل بأقراص الصباغة [الجوطون] وهادشي نوض الشوك فالراس بالنسبة لممتهني القطاع دالصباغة °°

هاد الموضوع كيهم الجميع ماشي غي الصباغين و الدروغريين و الأغلبية تساطح معاه و بزاف اللي معارفوش و سبقلو تشمت فيه و لهادشي غنحاول نبسطو ليكم ، غي هو حلو ودنيكم مزيان و تبعو اللي غنقول. و هنا كناكد بلي مكنعممش وماشي كلشي بحال بحال. 

هادي تقريبا 10 سنين بان واحد المولود جديد فالحرفة دالصباغة كيسميوه لحرايفيا بالجوطون ، يعني اي شركة ديال الصباغة تتخصص قسائم تخفيضية كتسمى جوطونات فالسطل ديال الصباغة فمثلا: سطل ديال عشرة كيلو غادي تلقى فيه قسيمة تخفيضية (جوطون) صفر ديال 50 درهم§ وسطل ديال  خمسين كيلو غتلقى فيه جوطون ديال 80 او 120  درهم حسب الشركة وكل شركة و ثمن الجوطون اللي كتوضعو فالسطل و ديك الجوطونات مكتوب عليها ان من حق الصباغ يشدها و يصرفها عند الدروغري سلعة أو يشدها فلوس. ومع فئة كبيرة من لمغاربة عزيز عليهم طرف دالخبز لبارد ، هاد الجوطون ولف الكسل و الغش فبزاااف من الصباغين شحال من صباغ ولا تيمشي مع مول الدار يشري الصباغة لي فيها الجوطون الغالي وتيشري بزاف ديال السلعة غي باش يلقى الجوطون ويصرفو ، و بهادشي يقدر الصباغ يطلع ألف درهم و كتر غي فبريكول صغير .

هاد الظاهرة خلقت مشكل كبير وكاين لي وصل مع الصباغ للقضاء ، راه كاين الصباغ اللي يكون مفاهم معاك فالتمن و كلشي مزيان و يقولك نجيبلك الصباغة وتقولو نشريها أنا و يقولك هانيا جيبلي قدة و قدة ، ونهار يجي يخدم و للقاك حيدتي الجوطونات اللي فالسطولة ميخدملكش ، أما كاين اللي لقا الصباغ كيخوي الصباغة (فالطواليط) غي باش تجيب سطولة خرين .

لهادشي تفكر اخويا المواطن نهار مشا معاك الصباغ عند الدروغري و داز بيناتهم داك الگود بين اللي مبرقتي فيه مقشعتي و كيفاش فرض عليك السطولة الصغار ديال الصباغة الغالية دالديگور حيت فيها الجوطون الغالي و تفكر أن البرطمة اللي صبغتي حتاجيتي فيها واحد 15 لسطل صغير و حسب مع راسك. 

الخلاصة شركات الصباغة لقات طريقة ذكية باش تسوق للمنتوج ديالها و الصباغة لقى الغفلة و بقى كيغمس بيديه بحوج و الدقة فالشعب ، يعني بالتعرابت دابا مني تمنع التعامل بهاد الجوطون ، غتشوف كيفاش الصباغة غيوليو يطلبو كتر ليدهم. 

و غي فالختمة بغيت نعاود لجملة اللي قلت لفوق بلي مكنعممش وفينما مشيتي كاين ولاد الناس.