المغرب عندو جالية شادة بلاصتها فمراكز القرار فأهم الشركات العالمية

  

هدا واحد من أحسن الإستجوابات لي دارهم الرمضاني فالبرامج ديالو.
هاد الإنترفيوو دارو مع سمير مشور لي هوا نائب مدير شركة سامسونغ و مدير قسم الجودة فنفس الشركة وهوا المسؤول على مراقبة أي حاجة كاتصنعها الشركة والتفاوض مع الجهات لي غاتبيع وتشري معاهم الشركة... هاد الشركة راه تابعها لنفس سامسونغ لي يمكن كاتقرا منو هاد البوسط حيت سامسونغ مكاتبيعش غا التيليفونات، هاد الشركة راه كاتبيع أي حاجة من البرا ديال الخياطة للاسيرونس للأدوية والطموبيلات وأي حاجة جات فبالك.
نرجع للموضوع ديالنا... لانتيرفيو ماشفتوش كامل ولكن خرجت منو بـ 8 ديال النقاط مهمين و لي هما هادو: 
✅ المغرب خدام على أن هادشي لي وقع فكورونا مايتعاودش ويحط خطط كايتوقعو فيها شنو ممكن يوقع وكيفاش ممكن يتعاملو مع الوضع وهادشي راه كاينين ناس يقدرو يديروه وإختصاصهم هوا تدبير الأزمات.
✅ اللقاح ديال كورونا ماشي كاع الدول قادرين يوصلو ليه، كاينين دول فقيرة ماعندهاش الإمكانيات باش تشريه وكاينين دول ماعندهاش الإمكانيات باش تلقح الناس حيت هاد اللقاح راه خاصو حقن وبراوات باش تعطيه للناس ومبردات باش تخليه فدرجة حرارة مناسبة وأمكانيات لوجيستية باش تجيب ملايين الناس وتلقحهم وتبقا متبع معاهم باش مورا 20 يوم تعاود تعطيهم الجرعة الثانية وهادشي كامل ماشي فمتناول كاع الدول.
✅كاينين دول لي ماغايوصلهم اللقاح تالـ2022 ولا كتر كاع حيت القدرة الإنتاجية ديال كاع الشركات لي خدامين على اللقاح ماتقدرش تفوت 2 مليار جرعة فالعام لي يالله نقدرو نلقحو بيها مليار نسمة فالعالم كلو وهاد الجرعات اصلا تباعو العام لي فات والدول لي سبق وحجزات الكميات ديالها هيا لي ليها الأولوية و لي هما دول الاتحاد الاوروبي وبريطانيا والمريكان، كندا، إسرائيل، الصين، روسيا، الخليج ويمكن فأفريقيا كلها كاين غا المغرب لي توصل باللقاح وغايبدا الحملة السيمانة الجاية.
✅ واخا يكونو عندك الامكانيات -نتا كدولة- وماعندكش ما يكفي من المعارف والإتصالات والقوة السياسية ماغاتخدش اللقاح حيت المفاوضات على اللقاح كاتكون مع السلطات الطبية ديال داك البلاد وماشي مع الشركات لي مصنعينو.
✅ الدول لي ماعندهمش باش يشريو اللقاح ولا عندهم مشاكل باش يوصلو للقاح خاصهم ضروري يدوزو من منظمات فحال GAVI لي هيا منظمة خاصة بتوفير اللقاحات للدول الفقيرة ولا منظمة الصحة العالمية باش هما بالعلاقات ديالهم يضبرو ليهم على اللقاح.
✅ المغرب خدام باش يحقق إستقلالية أكبر فمجال الصناعات الدوائية واللقاحات وهادشي يمكن يكون اما عن طريق شراكات مع شركات مغربية و لي عندهم خبرة محترمة فالمجال ولا مع دول أجنبية باش ديما المغرب تكون عندو أولوية فأي حاجة شبيهة بفيروس كورونا ولا أي مرض كيما كان.
✅ المغرب عند شركة أسترازينيكا البريطانية محطوط فقائمة الدول صاحبة الأولوية لي خاص يوصلهم اللقاح والسيد لي جاب الرمضاني على لسانو قال بلي هوا كايضغط على الشركة باش أن المغرب يتوصل باللقاح فأسرع وقت قبل من أي جهة اخرا وفعلا اللقاح وصل اليوم.
✅ المغرب عندو جالية شادة بلاصتها فمراكز القرار فأهم الشركات العالمية و لي كاتحكم فمصير دول وخاصو يستثمر فعلاقات وطيدة مع هاد الناس حيت فعلا راه سلاح مهم ممكن المغرب يلعب بيه وقت الحاجة و ناس فحال سمير مشور و لي منهم المئات فالعالم كامل وفشركات كبيرة فحال غوغل وابل وتيسلا وبفايزر، سامسونغ، تويتر... مثال على هادشي.
x