عشيري و خويا لي مولداتوش ليا مي

هادشي لي غنعاود ليكم وقع ليا هادي 5 سنين .. ساليت قرايتي و ملقيتش خدما و مشيت خدمت فمرجان .. كنتخلص من عند الناس يعني خدام فلاكيس .. واحد نهار كنت راجع من لخدمة بالليل و كانت شتا كطيح .. دزت من شي دروبا خاويين .. حتى وصلت لواحد درب مضلم .. بديت كنسمع غوات ديال شي درية .. مع كان بعيد الصوت بقيت كنقلب حتى كيبان ليا شي جوج شادين درية ولكن داكشي ماواضحش مع ضلام .. تميت غادي جيهتم و الصورة بدات كتوضح .. كيبان ليا بحالا باغين يتعداو عليها .. مشيت كنجري .. قلت ليهم محشمتوش حشوما هادشي لي كديرو .. و هو يزرب عليا واحد بواحد ديريكت .. و كانو هازين معاهم لمضا .. رديتها ليه شوية بدينا مضارين والو معاهم عصبة حتى كنحس بشي حاجة تخشات ليا فكرشي جيت نشوف لقيت دم .. ضربوني بالمضا .. طحت كتبان ليا غير درية شدتني و بديت كنغيب ولكن واخا كنغيب فديك اللحظة كتبان ليا درية زوينة .. كتبكي و كتقول ليا نوض أخويا عافاك .. صافي حتى غيبت .. فقت لقيت راسي فسبيطار .. و لقيت درية حدايا .. قلت ليها شنو وقع .. قالت ليا راه ضربوك و غيبتي و جاو شي ناس هوما لي جابوك هنا .. صافي شوية حتا كنغيب عوتاني 
فقت لقيتها مازال حدايا هي و عشيري و خويا لي مولداتوش ليا مي .. رضى لي خدام معايا هادي سنين .. بقا معايا و قلت لديك الدرية صافي غير سيري راني بيخير و داكشي لي كان قالت ليا شكرا بزاااف و سمحليا و مشات .. دوزت شي يامات فسبيطار و من بعد مشيت لدار .. بقيت فيها و كانت كتجي عندي هاديك الدرية مرا مرا قالت ليا سميتها ملاك .. و كان كيجي عندي صاحبي رضى فاش كيسالي الخدمة و كيبقا معايا حتال صباح .. صافي بريت و رجعت لخدمة واحد نهار تاصلت ب ملاك .. حيت كنت خديت نمرتها .. ولكن ماكتجاوبنيش من نهار وليت بيخير .. معرفتش علاش .. بقيت كنحاول نوصل ليها ولكن والو .. حتال واحد نهار عيطت ليها و هي تجاوبني .. ألو مالك علاش ماكتجاوبيش تخلعت عليك .. والو غير كنت مشغولا هاد ليامات .. من هدرتها حسيت بيها كتهرب مني .. المهم قنعتها نتلاقاو و داكشي لي كان تلاقينا و كان وجهها مبدل .. سولتها مالك .. مبغاتش تقول ليا .. شكيت بلي كاينا شي حاجة .. المهم بقينا كنهدرو عادي حتى بغات تمشي و تبعتها .. عرفت فين كتسكن .. مشيت لدار و دخلني الشك ولات كتبان ليا غريبة .. ديما كنعيط ليها و ماكتجاوبش .. و قررت نمشي عندها لدار .. واحد نهار مشيت بقيت كنتسنا حتا خرجات و تبعتها حتا فاتت دربهم .. و مشيت عندها ولكن الصدمة هي متقبلاتش نمشي عندها و كعات ولكن والو خاصني نعرف مالها و شكون هادوك لي بغاو يتعداو عليها .. دازت ليام و حاولت نقنعها نتلاقاو و داكشي لي كان .. ولينا كنتلاقاو مرا مرا و فينما كنسولها شكون هادوك لي بغاو يتعداو عليها كتقلب لهدرة .. و مع لوقت واحد نهار قررت نصارحها بداكشي لي كنحس بيه من جيهتها .. كنا خارجين و قلت ليها راني مرتاح و مابغيتش نضحك عليك و راني ناوي معاك المعقول .. عنقاتني و بدات كتبكي و بادلاتني نفس الشعور .. ولكن من هنا غتبدا المعانات و هي تصدمني و قالت ليا هاديك الدار لي كتسكن فيها غير دار صاحبتها و هادوك رجال مكلفهم باها كانو بغاو يديوها لدارهم حيت بغا يتزوج بيها واحد الراجل صاحب باها و هي مبغاتش حيت كبير عليها بزاف .. يمكن كبر من باها .. و بدات كتبكي و عنقتها و قلت ليها صافي متخافيش أنا معاك دابا و بقينا كنتمشاو شوية .. وصلتها لدار صاحبتها و تميت راجع لدار و هوما يوقفو عليا هادوك رجال .. و بحكم كانت فيا زعامة و ماكنتش كنخاف مهربتش واخا كنت عارفها ماغتخرجش سالكا .. قالو ليا غتبعد من هاديك الدرية ولا ماغيعجبك حال .. بديت كنضحك .. قلت ليهم علاش بالسلامة .. قالو ليا هدرة وحدا غنقولوها ليك بعد منها ولا غتندم .. متسوقتش لهدرتم تميت غادي ولكن ماخلاونيش .. قلت ليهم ماغنبعدش منها بينو ليا آش غدريو .. و هو يجبد واحد موس .. تخلعت الصراحة حيت خفت يضربوني بحال قبل .. ولكن مابينتش ليهم .. بديت كنضحك و هوما يبداو يضربو فيا .. واخا كنضرب حتا أنا ولكن هوما جوج و لحمية كتغلب سبع .. خلاوني طايح فلرض و قالو ليا الى مابعديش منها غتشوف شي حاجة كتر من هادشي و مشاو .. بقيت طايح فالارض شي نص ساعة عاد قدرت النوض .. موصلت لدار غير بزز .. غيط ليا رضى هدر معايا مبغيت نقول ليه والو لا هو لا ملاك .. لغد مشيت لخدمة و هو يشوف رضى لاطراس ديال الضرب .. سولني مبغيتش نقول ليه .. ولكن بكثرة ماحكر عليا قلت ليه .. قال ليا علاش ماقلتيهاش .. أودي غير مبغيتش نصدعك معايا .. باش ينسيني قاليا نساليو لخدمة و نمشيو نخرجو و داكشي لي كان .. المهم داز هاداك نهار حتال لغد و عيطت ل ملاك باش نتلاقاو و داكشي لي كان عوتاني .. غير سلمت عليها و هوما يوقفو علينا هادوك رجال تاني ولكن ماضاربناش كانو مخططين لخطة أخرى باش يطيحونيجاو عندنا و شدوني .. يحساب ليا غيضربوني صدقت زارب عليهم و لكن هوما ماكانوش ناويين يضربوني .. ناضو و مشاو فحالهم .. واااو ههههه داكدشي ديال الأفلام وليت كنبان كبير فعين ملاك ههه بقات كضحك و كتقول ليا لبطل ديالي .. ماكملاتش لفرحة حتا وقفو علينا لبوليس .. شدومي بلى منعرف علاش و داوني و ماخلاوش ملاك تمشي معايا .. داوني لكوميسارية .. و حققو معايا حتا كيجبدو لبا طرف ديال الحشيش من جيبي .. أوااااه آش هادشي و أنا ماكنكميش .. بقاو كيحقو معايا .. قلت ليهم راه ماشي ديالي ماعرفتش شكون دارو ليا فجيبي .. والو متيقونيش .. حتا تفكرت ملي شدوني دوك الجوج بلى شك هوما لي داروه .. هبطوني لاكاف ( جييور ) غير المجرمين .. لي سكران لي شافر و لبزنازا و لب مضارب ..... بقيت تما شي يوماين و هو يجي عندي رضى .. قاليا راه تبتو عليك التهمة أنا غنكلف شي محامي باش نحاولو نخرجوك بغرامة .. قلت ليه رضى راه .. و هو يقاطعمي قاليا عارف عارف و هي دخل ملاك كتبكي و عنقتني و قالت ليا ولاد لحرام هوما سباب .. قلت ليها راه عرفت بلى متخافي انا غنخرج .. و جاو خرجوهم .. أنا عرفت هادي خطة دارها هاداك لي بغا يتزوج بملاك باش يبعدني من طريقو ولكن مايحلمش بيها غنخرج بأي طريقة .. داوني لمحكمة باش يقدموني والمحامي ديالي طلب تأجيل الجلسة باش يلقى دلائل لي تبت البرائة ديالي و داكشي لي كان ولكن لقيت مشدود شي سمانة عاد غتكون الجلسة و فديك السمانة كان كيجي عندي رضى قاليا متخافش غنخرجك من هنا .. حتال واحد نهار.جا عندي رضى و المحامي قالو ليا بلي غنخرج بكفالة .. وصل لغد لجلسة نيت خرجت بكفالة .. لقيت ملاك كتسناني عنقتني و بقات كتبكي .. قلت ليها متخافيش انا معاك دابا .. ولكن من وجهها باينا واقعا شي حاجة سولتها مبغاتش تقول ليا .. وصلنا لدار و رضى بغا يقول ليا شي حاجة و هي تحبسو ملاك .. قلت ليها خليه يهدر .. و هو يقوليا راه هاداك الراجل لي بغا يتزوج بيها .. متورط مع عصابة و هو الشاف ديالهم و باها ماكانش عارف هادشي و ملي عرفو مبغاش يعطيهم ملاك و هوما يديرو ليه السم فالماكلا و قتلوه و دابا راه نقدرو نكونو مراقبين .. هادشي غادي و كيصعاب .. شافت فيا ملاك بزاحد لبرائة و الخوف حسيت بواحد الشعور عمرني حسيت بيه .. عنقتها و بقيت كنواسي فيها قلت ليها متخافيش هاد المشكل غيتحل .. دابا غتبقاي مع اخت رضى حتا تهدا الأمور و داكشي لي كان ديناها عند اخت رضى لي مزوجا و لغد مشيت انا وياها نزرو قبر باها و بقات كتبكي و بقيت كنواسي فيها .. صافي رجعتها عند اخت رضى .. و دابا خاصني نتاقم لباها و نتاقم لراسي و لملاك .. مشيت ديريكت عند صاحبت ملاك لي كانت عندها و بقيت كنراقب من بعيد حتى كيبانو ليا دوك جوج رجال مراقبين الدار بقيت حاضيهم حتى مشاو و تبعتهم .. مشاو لواحد لفيلا .. آشمن فيلا راه قصر .. عرفت كاين تما هداك الشارف .. بقيت حاضي من بعيد .. حتا عاودو خرجو .. و مشيت نقزت السور و دخلت بتخبيا .. كيبان ليا واحد الشارف من أخيب خلق الله بالاجرام لي كيدير .. بان ليا وراه واحد لبيت فيه لبيرو ديالو .. واه صافي عرفت منين نشدو .. خاصني نقلب تما تقدر تكون شي ورقة لي تفضح مخططاتهم ولكن ماعندي كيف ندير ندخل .. رجعت فحالي لدار و بقيت كنقلب فشي طريقة نطيح بيها داك الشارفجا عندي رضى قلت ليه خاصك تعاوني .. قاليا مرحبا .. عاودت ليه آش خاصنا نديرو .. و لغد جا عندي و مشينا حدا لفيلا ديال الشارف .. بقينا حاضيين شي 4 سوايع حتا خرج كلشي و دخلنا لبيرو بقينا كنقلبو شي 45 دقيقة حتا فقدنا الأمل و تمينا خارجين .. و هو يبان ليا واحد لكتاب محطوط فوق واحد الطبلة كشيت هزيتو كيبانو ليا شي وراق قريتهم لقيت فيهم الخطط ديال شحال من عملية دارها الشارف .. كان كيشفر الطونوبيلات و كيبيعهم فالسوق الأسود .. بهادشي باش دار لفيلا و كحلها لعاقا ولد لحرام .. ولكن لي غينفعنا كثر هو أن الوراق فيهم التوقيع ديالو .. خديتهم و خرجنا و هوما يتبعونا لكلاب و لعساسا بقينا غادين هربانين حتا سخفنا ولكن رضى عضو كلب هادشي لي غيصعب علينا الأمر مبقاش قادر يمشي هزيت رضى و غادين و لعساسا غادين و كيقربو لينا و لكلاب كينبحو حتا خرجنا حدا لباب كتوقف حدانا واحد الطونوبيل .. هبطات الزاز كنلقاها ملاك .. كتقول لينا طلعو دغيا .. طاعت رضى و مشينا .. و بقيت كنضحك على هاد الشجاعة لي فيها .. ماخلاتنيش بوحدي فهاد لمحنة .. بقيت كنعنق فيها و كتقول ليا تا طلق مني خليني مسوق و رضى بارك اللور و كيضحك و صلنا لسبيطار دخلنا رضى .. قلت ليه سمح ليا أخويا عذبتك معانا .. قليا سير عطي لبوليس داكشي صافي مشيت انا و ملاك سولتها منين جاتها الطونوبيل .. قالت ليا ديال اخت رضى .. وصلنا لدار ديالها و مشات ملاك و انا كملت باش نمشي عند لبوليس .. دخلت عندهم و ريتهم داكشي و قلت ليهم حتا هاديك التهمة لي خرجت منها بكفالة راه مآمرة .. قراو لوراق و قلبو علة سمية الشارف فالشوافة .. و لقاوه عندو سوابق بتهمة تهريب المخدرات و قارنو التوقيع لقاوه كيتشابه .. طار حتى عيا فاللخر مارتبش امورو مزيان .. قالو ليا تسنانا هنا .. بقيت مريح شي ساعتين .. عاد جاو شادين رجال ديالو .. ولكن قالو ليا الشارف هرب خوا لبلاد ملقاوش ليه الأثر .. و دوك رجال عتارفو بلي الشارف كلفهم باش يقتلو بان ملاك .. محسيتش براسي حتا نضت بقيت كنخلط فيهم .. و شدوني لبوليس عوتاني بت واحد 48 ساعة ولكن مبقاش فيا الحال .. خرجت مشيت ديريكت عند ملاك قالت ليا فين كنتي تخلعت عليك .. عاوت ليها آش وقع و فرحات ولكن فنفس الوقت بقا فيها الحال على الواليد ديالها .. عنقتها و مشينا عند رضى لي وقف معايا و ماخلانيش كنعوم فالغيس بوحدي .. و نعم الصداقة غامر بحياتو باش يعاوني داكشي علاش سميتو خويا ماشي صاحبي .. دازت ليام و نهار على نهار كتزيد طور علاقتي مع ملاك .. آه نسيت ماقلت ليكم .. ملاك ملي تزادت ماعرمرها عرفات مها تخلات عليها فاش كانت صغيرا و عاشت غير ني و باها حتى من خوتها ماعندهاش .. دابا حتا هي يتيمة بحالي .. تزوجنا و كانت حلالي .. و هادي 3 سنين باش تزوجنا و ربي سهل عليا و خدمت فشريكة و هي خدات بلاصتي فمرجان و عندنا ولد سميناه أحمد على سميت باها و مرا مرا كنمشيو نزوروه .. و كنزورو عائلتي .. آه رضى حتا هو تزوج و من الصيف لصيف كنسافرو كاملين ندوزو وقت زوين ......... النهاية