واخا نتعذّب ونقاسي

نبغي نهضر ونقول خلّيني ناسي ..

بلا مانجبد الماضي ونتفكّر البّاصي ..

بلا ما نبقا نتحسّر الا غدروني ناسي ..

واخا مابقيت عارف راسي من ساسي ..

واخا ذقت المرار وشربتو من كاسي ..

حيت تعلّمت فهاد الزمان خاصني نكون بارد مگلاصي ..

خاصني نصبر بوحدي واخا نتعذّب ونقاسي ..

لي دارني فالإحتياط ومخلّيني مبلاصي ..

علاش مازال غانخلّيه فحياتي أساسي ؟ ..

تعلّمت مانبقاش نضيّْع على موكة قرطاسي ..

حيت الوقت بغات غي " راسي يا راسي " ..

بغاتني نكون عارف مع كل واحد قياسي ..

حيت ماشي أي نقرة يغبر فيها نحاسي ..

الوقت بغاتني نكون جرتيلة بحال شي سيّاسي ..

باش مانبقاش فطريق الصدمات ديما مديبلايصي ..

ونعيييش حياتي كاملة عذاب و مآسي ..

تعلّْمت نحضي جنابي حيت بنادم كايتبدل فظرف قيّاسي ..

حيت لي بانت ليه فيك الضربة غادي يرميك فحاسي ..

واخا تعيا ما تكون زوين دّيير الخاطر و تواسي ..

راه بنادم عندو الغدر فقلبو مطراسي ..

تفرّج فيه من بعيد وشوف كيفاش وجهو صحيح ..

كيفاش يميل هاك و هاك و تدّيه الريح ..

كيفاش مع المدة يتبدّل غي بوحدو و يجيح ..

كيفاش يبغي يتحكّم فيك بحالا نتا ديال السريح ..

يبغيك تعبدووو بحال شي ضريح ..

كيفاش نتا تهديه المسك و هو يعطيك القيح ..

يعجبك بالنفاق و التسبيح ..

الصباغة والتمثيل ودموع التماسيح ..

وهو على مرض الغدر خاصو تلقيح ..

والله مايعتقك واخا يشوفك تنوض وطيح ..

يفرح ليك كي يشوفك فوق الفراش طريح ..

نتا تحتارمو و هو يصيح وعاطيها للنبيح ..

سوا عاملتيه مزيان وكنتي معاه مليح ..

سوا عطيتيه القاسح وكنتي معاه قبيح ..

اللهم ماتنافقش بنادم وتكون فحياتك صريح ..

جيه نيشان بلا معاني وبلا تلميح ..

ولي بغا يخرج من حياتك عطيه تسريح ..

ماتبقاش عاطيه قيمة مادام هو باغي يطيح ..

نقص البشر مع راسك رتاااح و استريح ..

حيت التيقار والتيساع شيء جميل و مُريح .